Mannauðsstefna Sjúkrahússins á Akureyri er leiðarljós stjórnenda og starfsfólks sjúkrahússins sem gerir Sjúkrahúsið á Akureyri framsækinn og eftirsóknarverðan vinnustað.
Mannauðsstefnan er sett fram til að stuðla að góðum vinnustað þar sem byggt er á víðtækri samvinnu, gagnkvæmri virðingu og að færni starfsfólks fái að njóta sín og dafna. Hún byggir á grunngildum sjúkrahússins sem eru: ÖRYGGI, SAMVINNA og FRAMSÆKNI.
Starfsmannaþjónustan hefur yfirumsjón með framkvæmd mannauðsstefnunnar og veitir stjórnendum og starfsfólki sérfræðiþjónustu og aðstoð í þeim málum sem undir hana heyra.
Hér verður fjallað um hvern þátt mannauðsstefnunnar.
Ráðningar, starfslýsingar og kjör
Lögð er áhersla á að ráða til starfa og halda í hæfileikaríka einstaklinga. Við val á starfsfólki er menntun, reynsla, færni og hæfni höfð að leiðarljósi.
| Með því að : | Ábyrgð: | Tími |
| Ávallt séu fyrirliggjandi kröfur til starfs og starfslýsingar. | Stjórnendur. | Endurskoðað á þriggja ára fresti. |
| Tryggja að rétt og faglega sé staðið að ráðningum. | Stjórnendur, starfsmannaþjónusta. | Sífellt. |
| Tekið sé vel á móti nýju starfsfólki og tryggt að það fái nauðsynlegar upplýsingar, kynningu og aðlögun á vinnustaðnum. | Stjórnendur, starfsmannaþjónusta. | Sífellt. |
| Í launa- og kjaramálum sé farið eftir gildandi kjara- og stofnanasamningum á hverjum tíma. | Framkvæmdastjórn, starfsmannaþjónusta. | Sífellt. |
Stjórnun, réttindi og skyldur
Öllu starfsfólki ber að fara að lögum um réttindi og skyldur starfsmanna ríkisins. Lögð er áhersla á sameiginlega ábyrgð starfsfólks og stjórnenda við að veita bestu mögulegu þjónustu.
| Með því að: | Ábyrgð: | Tími |
| Stjórnendur tileinki sér góða stjórnunarhætti með jákvæðu viðhorfi til samstarfsfólks og virku upplýsingastreymi og dreifingu valds og ábyrgðar. | Framkvæmdastjórn, stjórnendur. | Sífellt. |
| Stjórnendur og starfsfólk vinni sameiginlega að markmiðum sjúkrahússins, virði og kunni skil á þeim meginreglum laga og reglugerða sem gilda um starfsvettvanginn. | Stjórnendur, starfsfólk. | Sífellt. |
| Starfsfólk leitist við að laga sig að breytilegum kröfum sem til þess eru gerðar á hverjum tíma, t.d. varðandi fagleg og tæknileg atriði. | Stjórnendur, starfsfólk. | Sífellt. |
Starfsþróun og fræðsla
Lögð er áhersla á að gefa starfsfólki tækifæri til starfsþróunar með markvissri þjálfun og fræðslu. Mikilvægt er að starfsfólk miðli þekkingu og reynslu sín á milli og til nýs starfsfólks og nema.
| Með því að: | Ábyrgð: | Tími |
| Starfsþróun sé reglubundinn þáttur í starfsáætlun deilda. | Stjórnendur, starfsfólk. | Árlega. |
| Allt starfsfólk taki þátt í starfsmannasamtali. | Stjórnendur, starfsmannaþjónusta, starfsfólk. | Árlega. |
| Starfsfólk sé hvatt til þátttöku í vísinda-, þróunar-, og gæðastarfi. | Stjórnendur, starfsmannaþjónusta, deild mennta og vísinda. | Sífellt. |
| Skipuleggja og standa að fræðslu fyrir starfsfólk. | Starfsmannaþjónusta,fræðsluráð, deild mennta og vísinda. | Sífellt. |
Vinnuumhverfi, öryggi og heilsa
Gott og öruggt vinnuumhverfi er lykilþáttur í góðri líðan starfsfólks. Ábyrgðin á heilsu okkar og vellíðan er sameiginlegt verkefni sem mikilvægt er að stjórnendur og starfsfólk taki fullan þátt í.
| Með því að: | Ábyrgð: | Tími |
| Samskipti starfsfólks innan og utan sjúkrahússins grundvallist á virðingu fyrir tilvist, þekkingu og skoðunum annarra. | Stjórnendur, starfsfólk. | Sífellt. |
| Starfsfólk sé hvatt til að leggja rækt við eigin heilsu með ástundun heilbrigðs lífernis. | Stjórnendur, starfsmannaþjónusta, starfsfólk. | Sífellt. |
| Allar deildir sjúkrahússins geri skriflega áætlun um öryggi og aðbúnað á vinnustað (áhættumat) og framfylgi henni lögum samkvæmt. | Stjórnendur, öryggisverðir, öryggistrúnaðarmenn. | Árlega. |
| Líða ekki einelti, kynferðislega áreitni eða aðra þá framkomu sem skapi öðrum vanlíðan eða óöryggi. | Stjórnendur, starfsmannaþjónusta, starfsfólk. | Sífellt. |
| Á sjúkrahúsinu sé starfandi stuðningsteymi, þar sem starfsfólki standi til boða stuðningsviðtöl. | Forstjóri. | Sífellt. |
| Veita starfsmönnum ráðgjöf og leiðbeiningar um úrræði vegna lífstíls- og vinnutengds heilsuvanda, þ.m.t. kulnun og vinnuálag. | Starfsmannaþjónusta. | Sífellt. |
Jafnrétti
Lögð er áhersla á jafnrétti án tillits til kynferðis, trúarbragða, skoðana, þjóðernisuppruna, kynþáttar, litarháttar, efnahags, ætternis og stöðu að öðru leyti.
| Með því að: | Ábyrgð: | Tími |
| Hafa starfandi jafnréttisnefnd á sjúkrahúsinu, sem framfylgi stefnu og áætlun sjúkrahússins í jafnréttismálum. Jafnréttisstefna og jafnréttisáætlun er hluti mannauðsstefnunnar. | Forstjóri. | Sífellt. |
| Starfsfólk virði jafnréttisstefnuna og vinni í anda hennar. | Starfsfólk. | Sífellt. |
Siðfræði
Lögð er áhersla á mikilvægi þess að starfsfólk virði trúnað gagnvart sjúklingum og réttindum þeirra sem og trúnað gagnvart samstarfsfólki um persónuleg og viðkvæm mál.
| Með því að: | Ábyrgð: | Tími |
| Starfsfólk vinni eftir siðareglum starfsstétta. | Stjórnendur, starfsfólk. | Sífellt. |
| Starfandi sé siðanefnd á sjúkrahúsinu. Vísindarannsóknir fari fram samkvæmt leyfi og reglum hennar. | Forstjóri. | Sífellt. |
| Við ráðningu, á kynningarfundum með nýliðum og í annarri fræðslu fyrir starfsfólk sé mikilvægi trúnaðar rætt. | Stjórnendur, starfsmannaþjónusta. | Sífellt. |
Starfslok
Lögð er áhersla á að koma til móts við starfsfólk þegar líður að starfslokum.
| Með því að: | Ábyrgð: | Tími |
| Gefa starfsfólki tækifæri á að breyta starfshlutfalli sínu síðustu misserin í starfi. | Stjórnendur. | Sífellt. |
| Bjóða starfsfólki sem nálgast starfslok, vegna aldurs, námskeið til að undirbúa þau tímamót. | Stjórnendur, starfsmannaþjónusta. | Sífellt. |
| Starfsfólki bjóðist starfslokaviðtal þegar það lætur af starfi. | Stjórnendur, starfsmannaþjónusta. | Sífellt. |
Uppfært: þri 2.nóv 2021
