Almenn göngudeild

Forstöðuhjúkrunarfræðingur: Inga Margrét Skúladóttir
Staðgengill forstöðuhjúkrunarfræðings: Sigrún Rúnarsdóttir

Almenn göngudeild skiptist í nokkrar  þjónustueiningar með margvíslega þjónustu frá 8-16 virka daga fyrir einstaklinga 18 ára og eldri af báðum kynjum og eftir atvikum fyrir börn og unglinga. Þjónustusvæðið nær yfir Norður- og Austurland.

Móttaka dagsjúklinga
Á mánudögum og þriðjudögum eru einungis blóðmeina- og krabbameinslyfjameðferðir og ýmsar stoðmeðferðir tengdar krabbameinum sem krabbameinssérfræðingar frá Landspítala háskólasjúkrahúsi bera ábyrgð á.

Frá miðvikudegi til föstudags eru lyfjameðferðir við margs konar langvinnum sjúkdómum, blóð- og blóðhlutagjafir, uppvinnsla á sjúkdómum, fræðsla og kennsla tengd ýmsum rannsóknum og lyfjagjöfum.

Meltingarspeglun
Einingin tekur á móti einstaklingum sem þurfa að gangast undir rannsóknir eða aðgerðir í gegnum holsjá á meltingarvegi.

Þvagfæra- og aðgerðastofa
Á stofunni eru gerðar litlar aðgerðir svo sem blettatökur, ýmis konar sýnatökur, þvagfærarannsóknir, þvagfæraspeglanir, ísetningar- og skipti á ofanklyftarleggjum, augnlokaþrymilsnám og leghálsspeglanir.

Sáramóttaka
Á móttökunni er veitt sérhæfð meðferð við sárum eins og langvinnum fótasárum af margvíslegum toga, bráðasárum eins og eftir slys, bruna og aðgerðir.

Sérfræðilæknar sjúkrahússins veita ráðgjöf á sáramóttökunni eftir þörfum.

Sykursýkimóttaka
Umfang sykursýkimóttökunnar er að breytast, búið er að auka stöðugildi hjúkrunarfræðings og í náinni framtíð verður sett upp móttaka í innkirtlasjúkdómum með þverfaglegt samstarf hjúkrunarfræðings, næringarráðgjafa og læknis.

Á móttökunni er veitt fræðsla og eftirfylgni með skjólstæðingum með sykursýki.

Næringarráðgjöf
Næringarráðgjafi veitir skjólstæðingum sem eru á legudeildum eða göngudeildum sjúkrahússins þjónustu og er hann starfandi aðra hverja viku á deildinni

Ljósameðferð
Meðferð er veitt skjólstæðingum með ýmsa húðkvilla eins og Psoriasis, exem, D-vítamín skort og skjallbletti (Vitiligo).

Blóðþynning
Hjúkrunarfræðingar sjá um eftirfylgni blóðrannsókna, ráðgjöf, fræðslu og ákvörðun á lyfjaskammti tengt blóðþynningu ferlisjúklinga. Samstarf er við lyflækna sjúkrahússins.

Móttaka hjúkrunarfræðinga með hjartafræðslu
Hjúkrunarfræðingar á lyflæknissviði veita skjólstæðingum sem hafa farið í hjartaþræðingu eða hjartaaðgerð fræðslu og eftirlit alla miðvikudaga. Tvisvar sinnum á ári er boðið upp á fræðsludagskrá fyrir skjólstæðinga og aðstandendur þeirra, þeim að kostnaðarlausu.

Hjúkrunarfræðingarnir vinna í samráði við hjartasérfræðinga á lyflækningasviði og við Hjarta- og lungnastöðina á Bjargi.

Móttaka hjúkrunarfræðinga fyrir stóma sjúklinga
Tveir hjúkrunarfræðingar á skurðlækningadeild hafa það sérverkefni að aðstoða þá einstaklinga sem hafa fengið stóma. En þeir starfa við deildina annan miðvikudag í mánuði frá kl. 15-16.

Stómaþegar geta pantað sér tíma þurfi þeir á aðstoð að halda ásamt því að hjúkrunarfræðingar gefa tíma.

Stoðtækjafræðingur og sjóntækjafræðingur
Hafa samning um leigu á aðstöðu og veita þjónustu. Stoðtækjafræðingur kemur  að jafnaði tvisvar sinnum í mánuði en sjóntækjafræðingur að jafnaði tvisvar á ári.

Sérfræðimóttaka
Eftirtaldir aðilar veita þjónustu:

Gigtarsérfræðingur, hjartasérfræðingar, innkirtlasérfræðingur, krabbameinssérfræðingur, lungnasérfræðingur, meltingarsérfræðingar, skurðlæknar, smitsjúkdómalæknir, þvagfærasérfræðingar og öldrunarlæknar.

Aðrir faghópar geta eftir atvikum nýtt aðstöðu göngudeildarinnar.

Tekið er gjald fyrir komu á deildina samkvæmt gjaldskrá Sjúkratrygginga Íslands.