Á tímabilinu 20. september til 6. nóvember 2021 vann Gallup þjónustukönnun fyrir Sjúkrahúsið á Akureyri þar sem markmiðið var að mæla traust almennings til sjúkrahússins á starfssvæði SAk ásamt því að mæla afstöðu þeirra sem hafa nýtt sér þjónustu sjúkrahússins. Um var að ræða netkönnun sem náði til rúmlega 2400 manna úrtaks, 18 ára og eldri sem búsettir eru á svæðinu frá Austur-Húnavatnssýslu í vestri til Djúpavogs í austri (í póstnúmerum 540-766). Svarhlutfall var 52,6%. Heilt yfir voru niðurstöðurnar jákvæðar fyrir sjúkrahúsið og voru það 88% þátttakenda sem bera mikið traust til stofnunarinnar og lækkaði traustið um 2% frá því í fyrra. Ríflega 50% þátttakenda hafði nýtt sér þjónustu sjúkrahússins á sl. 12 mánuðum og voru 92,2% þeirra sem nýttu þjónustuna ánægð með þjónustu sjúkrahússins. Helsta ástæða þess tengdist góðri þjónusta, góðu starfsfólki og viðmóti. Helsti þáttur óánægju tengdist löngum biðtíma eftir þjónustu.
