„Þá var kátt í höllinni“......eða á sjúkrahúsinu allavega.
Sjúkrahúsið á Akureyri byrjaði bólusetningu starfsfólks vegna COVID-19 kl. 10 í dag miðvikudaginn 30. desember 2020.
Fyrsti starfsmaður Sjúkrahússins á Akureyri sem fékk bólusetningu var Jón Pálmi Óskarsson forstöðulæknir bráðalækninga. Alls verður um 130 einstaklingum boðin bólusetning í fyrstu umferð sem er það magn sem sjúkrahúsið fær úthlutað af þessari fyrstu sendingu til landsins. Það dugar til að bólusetja starfsmenn er sinna sjúklingum á bráðamóttöku, gjörgæslu og þá sem mest hafa sinnt COVID-19 sjúklingum. Þá verður elsti inniliggjandi sjúklingahópurinn bólusettur. Jóna Valdís Ólafsdóttir forstöðulyfjafræðingur tók á móti fyrstu 130 skömmtunum af COVID-19 bóluefninu fyrir hönd sjúkrahússins.
Þetta er gleðidagur sem lengi hefur verið beðið eftir. Margir hafa komið að undirbúningi og eiga þeir allir miklar þakkir skyldar fyrir sín störf.
