Nú þegar COVID-19 faraldurinn virðist vera að fjara út hér á landi, í bili að minnsta kosti, og létt hefur verið á viðbúnaði fer hefðbundin starfsemi að komast í eðlilegt horf. Áhrif faraldursins á hefðbundna starfsemi sjúkrahússins sést vel þegar starfsemistölur tímabilisins janúar til apríl eru bornar saman við fyrra ár. Skurðaðgerðir eru um 430 færri eða 31%, komum á dag- og göngudeildir fækkaði um 10-35% og sama er með rannsóknir. Þá fækkaði legudögum um 14% og komur á bráðamóttöku voru um 20% færri.
Það tókst vel að undirbúa og eiga við COVID-19. Það var áhlaupaverk sem tókst vel. Til hamingju með það öll.
Haldið verður áfram að létta á aðgangstakmörkum en munum samt sem áður að hafa smitgát í heiðri. Nú liggur fyrir sú áskorun að vinna upp þá þjónustu sem frestað var og er það starf komið í gang. Einnig er mikilvægt að nýta reynslu og þekkingu undanfarinna vikna til umbóta í starfi.
Sumarstarfsemi verður samkvæmt starfsáætlun.
Alþjóðaheilbrigðismálastofnunin (WHO) hefur helgað hjúkrunarfræðingum árið 2020 og alþjóðadagur hjúkrunar var 12. maí sl.. Mikilvægi hjúkrunar hefur berlega komið skýrt fram í þeim verkefnum sem heilbrigðisþjónustan hefur staðið í að undanförnu. Ég óska hjúkrunarfræðingum til hamingju með daginn og árið.
Áformað var að hafa ársfund sjúkrahússins í maí en í ljósi aðstæðna verður hann færður til haustsins.
Munum: ÖRYGGI – SAMVINNA - FRAMSÆKNI
Bestu kveðjur og góða helgi.
Bjarni Jónasson
